पत्रकारक दिलभूषण पाठक विरुद्ध दायर भएको साइबर मुद्दाको पेसी असार २२ गते तोकिएको छ। सोमबार जिल्ला सरकारी वकिल कार्यालय काठमाडौंले पत्रकार पाठकविरुद्ध विद्युतीय कारोबार (साइबर क्राइम) को मुद्दा दर्ता गरेको थियो। वकिल कार्यालयले काठमाडौं जिल्ला अदालतमा कैद र क्षतिपूर्ति माग गर्दै मुद्दा दर्ता गरेको हो।
नेपाल प्रहरीको साइबर ब्युराले अनुसन्धान गरी प्रतिवेदन बुझाएपछि सरकारी वकिलमार्फत मुद्दा दर्ता गरेको हो। पाठकले नेपाली कांग्रेसका सभापति शेरबहादुर देउवा र परराष्ट्रमन्त्री आरजु राणा देउवाका छोरा जयवीर देउवाका विषयमा युट्युबमार्फत सामग्री प्रकाशित गरेका थिए। उनले काठमाडौंमा नयाँ सञ्चालनमा आएको हिल्टन होटलमा जयवीरको लगानी रहेको, अस्ट्रेलिया, क्यानडा, दुबईमा समेत लगानी रहेको भन्ने दाबी गरी भिडियो सामग्री प्रसारण गरेका थिए। उनले प्रसारण गरेको सामग्रीमा कुनै प्रमाणबिना आफ्नाविरुद्ध घृणा, द्वेष फैलाएको र चरित्रहत्या गरेको आरोप प्रहरीमा उजुरी परेको थियो।
प्रहरीले पाठकलाई पक्राउका लागि अदालतबाट पुर्जीसमेत लिएको थियो। त्यसविरुद्ध पाठक उच्च अदालत पुगेका थिए। उच्च अदालतले उनलाई पक्राउ नगर्न अन्तरिम आदेश जारी गरेको थियो। उनलाई विद्युतीय कारोबार ऐन २०६३ अन्तर्गत सजाय माग गरिएको छ। कसुरदार ठहरिए एक लाख रुपैयाँसम्म जरिवाना वा ५ वर्षसम्म कैद वा दुवै सजाय हुनसक्ने कानुनी व्यवस्था छ।
Discussion about this post