ऊनको स्वीटर’ फिल्मले अहिले सम्म कति कमायो ?

फिल्म ‘ऊनको स्वीटर’ प्रदर्शनको चौथो सातामा प्रवेश गरेको छ । फिल्मले तेस्रो सातासम्म राम्रो व्यवसाय गर्दै चौथो सातामा प्रवेश गरेको हो ।

आर्टमाण्डू नेपालको ब्यानरमा निर्माण भएको फिल्मले तेस्रो सातासम्म देशव्यापी रूपमा १० करोड ५ लाख रुपैयाँ ग्रस कलेक्सन गरेको निर्माण पक्षले जनाएको छ । प्रदर्शनको चौथो हप्तामा प्रवेश गरिसक्दा पनि फिल्मले देशभर १०० भन्दा बढी शो पाएको छ ।

नवीन चौहानको लेखन तथा निर्देशनमा बनेको चलचित्रले रिलिजको पहिलो दिनदेखि नै सकारात्मक प्रतिक्रियासहित दर्शकको साथ पाउँदै आएको छ । फिल्ममा विपिन कार्की, मिरुना मगर, परीक्षा लिम्बु, एलेक्स पारस, विल्सनविक्रम राई, सुरज तमु, भावना खपाङ्गीमगर र सुनील पोखरेलको अभिनय छ । हालसम्म फिल्मको ओभरसिज कलेक्सन सार्वजनिक गरिएको छैन । तर विदेशमा पनि फिल्मले राम्रो प्रदर्शन गरिरहेको बताइन्छ । देशकै ठुलो मल्टिप्लेक्स चेन क्युएफएक्स सिनेमाजले फिल्मको व्यापारको आधारमा सुपरहिटको ट्याग दिएको छ ।