बर्खा सुरू भएसँगै नारायणगढ -बुटवल सडक खण्डको यात्रा कष्टपूर्ण

नारायणगढ बुटवल सडक खण्ड भएर यात्रा गर्ने यात्रुहरूको वर्षा भएपछि दुर्दशा हुने गरेको छ । यो सडक खण्डमा पर्ने दाउन्ने ,दुम्किबासको बिनयी खोला र चोरमाराको गिरुबारी खोलामा बनेको डाइभर्सन हल्का वर्षा हुनासाथ बाढीले बगाउने गरेकाले उनीहरूले वर्षा भएसँगै यो दुर्दशा भोग्नु परेको हो । बिनयी खोलामाथिको पुल भास्सिएको ४ महिना पुगे पनि हालसम्म मर्मत हुन सकेको छैन । चोरमाराको गिरुबारी खोलामाथिको पुल पनि मर्मत नहुँदा यात्रुले सास्ती खेप्दै आएका छन् । वर्षा हुनासाथ दाउन्नेमा सडक चिप्लो भएर सवारी गुड्न सक्दैनन् । बिहीबार राति बाढीले दुम्कीवासको बिनयी खोलामा रहेको डाइभर्सन  बगाएपछि राति २ बजेदेखि  बिहान ९ बजेसम्म यात्रुहरू सडकमा नै अलपत्र परे ।  शुक्रबार बिहान ९ बजे पछि भने  त्यहाँ रोकिएका साना र यात्रुबहाक गाडी होसी,सर्दी हुँदै पठाइएको प्रहरीले जानकारी दिएको छ ।